पत्नीच्या डोक्यात मारहाण करून खून करणाऱ्या पतीला अटक
पाय घसरून पडल्याचा बनाव : रक्ताचे डाग पुसून पुरावा नष्ट करणारे दोघे नातेवाईकही जेरबंद
महाराष्ट्र न्युज नेटवर्क
पुणे : दारूच्या नशेत पतीने पत्नीच्या डोक्यात कठीण वस्तूने मारहाण करून तिला गंभीर जखमी केले. उपचार सुरू असताना पाच दिवसांनी तिचा मृत्यू झाला. ही घटना पाय घसरून पडल्याने घडल्याचा बनाव करण्यात आला होता. मात्र शवविच्छेदन अहवाल आणि स्थानिक महिलांच्या जबाबांवरून खडक पोलिसांनी पतीसह पुरावा नष्ट करणाऱ्या दोन नातेवाईकांना अटक केली आहे.
याप्रकरणी सहायक पोलीस निरीक्षक अनिता तोंडे यांनी खडक पोलीस ठाण्यात फिर्याद दिली आहे. त्यानुसार पती तुषार ऊर्फ गणेश विलास तुपसौंदर्य (वय २८, रा. हरकानगर, भवानी पेठ), त्याचा नातेवाईक मनोज रोहिदास कांबळे (वय ३९, रा. काशीवाडी, भवानी पेठ) आणि त्याची पत्नी वनिता मनोज कांबळे (वय ३२, रा. गंजपेठ) यांना अटक करण्यात आली आहे. मृत महिलेचे नाव वैष्णवी तुषार तुपसौंदर्य (वय २३, रा. गंजपेठ) असे आहे.
पोलिसांनी दिलेल्या माहितीनुसार, २ फेब्रुवारी रोजी ससून रुग्णालयातून महिलेच्या मृत्यूची माहिती खडक पोलिसांना देण्यात आली. सहायक पोलीस निरीक्षक अनिता तोंडे व त्यांच्या सहकाऱ्यांनी ससून रुग्णालयात जाऊन पंचनामा केला. त्या वेळी तुषार तुपसौंदर्य याने २८ जानेवारी रोजी वैष्णवी हिचा घरात पाय घसरून पडल्याने डोक्याला मार लागल्याचे सांगितले होते.
मात्र शवविच्छेदन अहवालात डोक्याला झालेल्या मारामुळे मृत्यू झाल्याचे नमूद करण्यात आले. अनिता तोंडे यांनी शवविच्छेदन करणाऱ्या डॉक्टरांशी चर्चा केली असता, वैष्णवी हिच्या डोक्याला, कानाजवळ व डोळ्याजवळ गंभीर जखमा आढळून आल्या. या जखमा पाय घसरून पडल्याने होऊ शकत नसून टणक वस्तूने जबर मारहाण केल्यामुळे झाल्याचे डॉक्टरांनी स्पष्ट केले.
यानंतर पोलिसांनी तुपसौंदर्य यांच्या घराजवळील नागरिकांकडे चौकशी केली. स्थानिक महिलांनी दिलेल्या माहितीनुसार, २८ जानेवारी रोजी दुपारी साडे दोनच्या सुमारास तुषार याने दारूच्या नशेत वैष्णवी हिच्यावर मारहाण केली. या मारहाणीत ती रक्ताच्या थारोळ्यात बेशुद्ध अवस्थेत पडली होती. त्या वेळी तुषार बाहेर उभा राहून फोनवर जोरजोरात बोलत आपण तिला मारून टाकल्याचे सांगत होता.
स्थानिक महिलांनी त्याच्या मुलांना बोलावून वैष्णवी हिला उपचारासाठी ससून रुग्णालयात दाखल केले. दरम्यान, तुषारचे नातेवाईक मनोज कांबळे आणि त्याची पत्नी वनिता कांबळे यांनी घरातील फरशीवर सांडलेले रक्त पुसून पुरावा नष्ट केला.
डॉक्टरांचा अहवाल आणि स्थानिक महिलांचे जबाब लक्षात घेऊन पोलिसांनी तुषार तुपसौंदर्य याच्याविरुद्ध खुनाचा गुन्हा दाखल करून त्याला अटक केली. तसेच पुरावा नष्ट केल्याप्रकरणी मनोज व वनिता कांबळे यांनाही अटक करण्यात आली आहे. या प्रकरणाचा तपास पोलीस निरीक्षक शर्मिला सुतार करीत आहेत.
