मूल्यांकन चाचणीची प्रश्नपत्रिका सोशल मीडियावर प्रसारित

सोशल मीडियावरील ६ युट्युब चॅनेलविरुद्ध गुन्हा दाखल : ३० लाख विद्यार्थी परीक्षा देतात

महाराष्ट्र न्युज नेटवर्क

पुणे : शालेय विद्यार्थ्यांसाठी राज्य शैक्षणिक संशोधन आणि प्रशिक्षण परिषदेकडून घेण्यात येणाऱ्या नियतकालिक मूल्यांकन चाचणी (पॅट ३) परीक्षेची प्रश्नपत्रिका सोशल मीडियावरील युट्युब चॅनेलवर प्रसारित करण्यात आल्याचा प्रकार उघडकीस आला आहे. या प्रकरणी विश्रामबाग पोलीस ठाण्यात सहा युट्युब चॅनेलविरुद्ध गुन्हा दाखल करण्यात आला आहे.

याबाबत राज्य शैक्षणिक संशोधन प्रशिक्षण संस्थेच्या डॉ. मनीषा ताठे यांनी विश्रामबाग पोलीस ठाण्यात फिर्याद दिली आहे. त्यावरून Learn With Me, GK Tracer Official, NP Return Things, Academic Education, Priya Gharat RZP School, Kailas Sir Maths या सहा युट्युब चॅनेलधारकांवर गुन्हा दाखल करण्यात आला आहे.

दुसरी ते आठवीतील विद्यार्थ्यांचे मराठी, इंग्रजी, गणित या विषयांचे मूल्यांकन करण्यासाठी दरवर्षी या चाचणीचे आयोजन केले जाते. राज्यभरातील शाळा, खासगी अनुदानित शाळांमधील सुमारे ३० लाख विद्यार्थी ही परीक्षा देतात. मात्र, परीक्षा होण्यापूर्वीच प्रश्नपत्रिका सोशल मीडियावर प्रसारित झाल्याचे उघडकीस आले.

विद्यार्थ्यांची शैक्षणिक क्षमता तसेच गणित, इंग्रजी, मराठी विषयांतील कल जाणून घेण्यासाठी राज्य शैक्षणिक संशोधन आणि प्रशिक्षण परिषदेकडून नियतकालिक मूल्यांकन चाचणी (पॅट ३) ही परीक्षा घेतली जाते.

११ एप्रिल रोजी मराठी भाषेची संकलित चाचणी (प्रश्नपत्रिका क्रमांक १), १५ एप्रिल रोजी गणित विषयाची संकलित चाचणी (प्रश्नपत्रिका क्रमांक २) आणि २२ एप्रिल रोजी इंग्रजी विषयाची प्रश्नपत्रिका (क्रमांक ३) घेण्याचे नियोजन करण्यात आले होते. प्रश्नपत्रिका महाराष्ट्र राज्य शैक्षणिक संशोधन परिषदे कडून तयार करण्यात येतात.

पुण्यातील एका खासगी मुद्रणालयातून प्रश्नपत्रिकांची छपाई केली जाते. प्रश्नपत्रिका छापल्यानंतर त्या राज्यातील प्रत्येक जिल्ह्यात वितरित करण्यात येतात. ही प्रक्रिया गोपनीय असते. मात्र, परीक्षा होण्यापूर्वीच सहा चॅनेलवर मराठी, इंग्रजी, गणित या तीन विषयांच्या प्रश्नपत्रिका प्रसारित झाल्याचे उघडकीस आले. त्यानंतर डॉ. ताठे यांनी पोलिसांकडे फिर्याद दिली.

या प्रकरणी महाराष्ट्र विद्यापीठ मंडळाच्या तसेच इतर परीक्षांमध्ये होणाऱ्या गैरप्रकारास प्रतिबंध अधिनियम १९८२ चे कलम ५ व ६ अन्वये आणि माहिती-तंत्रज्ञान कायद्यान्वये गुन्हा दाखल करण्यात आला आहे. सोशल मीडियावर प्रश्नपत्रिका कशा प्रकारे प्रसारित करण्यात आल्या, याचा तपास सुरू असल्याची माहिती पोलिसांनी दिली. पोलीस निरीक्षक अरुण घोडके तपास करत आहेत.

मुलांचा कल समजणे अवघड
ही परीक्षा विद्यार्थ्यांचा कल कोणत्या बाजूला आहे आणि त्यांना कोणत्या विषयात अधिक समज आहे हे जाणून घेण्यासाठी घेतली जाते. त्याचा त्यांच्या पुढील आयुष्याच्या दृष्टीने तसेच पालकांसाठी मार्गदर्शक म्हणून उपयोग होतो. ही प्रश्नपत्रिका सोशल मीडियावर प्रसारित झाली असली तरी त्यातील दोन परीक्षा आधीच पार पडल्या होत्या. तिसरी परीक्षा २२ एप्रिल रोजी घेण्यात आली. प्रश्नपत्रिका आधीच प्रसारित झाल्यामुळे काही विद्यार्थ्यांना पेपर सोपा गेला असण्याची शक्यता आहे. मात्र, त्यामुळे विद्यार्थ्यांचा खरा कल समजणे अवघड होणार आहे.