९ सायबर गुन्हेगारांवर प्रथमच मोक्का कारवाई
पिंपरी चिंचवड सायबर पोलिसांची कामगिरी : ज्येष्ठ नागरिकाची ११ कोटींची केली होती फसवणूक
महाराष्ट्र न्युज नेटवर्क
पुणे : बनावट ट्रेडिंग अॅपद्वारे ज्येष्ठ नागरिकाची ११ कोटी १३ लाख रुपयांची फसवणूक केलेल्या गुन्ह्यात पिंपरी चिंचवड पोलिसांनी ९ सायबर गुन्हेगारांवर मोक्का अंतर्गत कारवाई केली आहे. सायबर गुन्हेगारांवर मोक्का कारवाई करण्याची ही पहिलीच वेळ आहे. तपासादरम्यान पोलिसांनी आरोपींकडील गोठविलेली २ कोटी ६५ लाख ७६ हजार रुपयांची रक्कम फिर्यादींना परत मिळवून देण्यासाठी न्यायालयामार्फत आदेश प्राप्त केले आहेत.
अभय बाबासाहेब पाटील (वय ३४, रा. हातकणंगले, जि. कोल्हापूर), शिवतेज राजेंद्र पोटे (वय ३०, रा. वाघोली), युवराज ऊर्फ संतोष सतीश मुदलीयार (वय ३५, रा. निंबाळकरनगर, लोहगाव), रॉनी ऊर्फ पंकज मंगू गिरीगोस्वामी (वय २४, रा. भिंडर, जि. उदयपूर, राजस्थान), प्रल्हाद पृथ्वीराज गाडरी (वय २३, रा. ढुंढिया, ता. मावळी, जि. उदयपूर, राजस्थान), उमेश लक्ष्मीलाल भट्ट (वय २१, रा. सदरबझार, भडसोरा, राजस्थान), महेश करबसप्पा उडचणे (वय २८, रा. रावळ पाडा, दहिसर पूर्व, मुंबई), राहुल बहादूरप्रसाद मोर्य (वय २४, रा. रावळ पाडा, दहिसर पूर्व, मुंबई), शेख अब्दुल रहिस शेख अब्दुल रशीद (वय २६, रा. समतानगर, छत्रपती संभाजीनगर) अशी मोक्का कारवाई झालेल्यांची नावे आहेत. या गुन्हेगारांना हातकणंगले, मुंबई, राजस्थानमधील उदयपूर आणि छत्रपती संभाजीनगर येथून अटक करण्यात आली आहे.
शेअर मार्केटमध्ये जास्त परतावा देण्याचे आमिष दाखवून आरोपींनी फिर्यादींना गुंतवणूक करण्यास प्रवृत्त करून ११ कोटी १३ लाख रुपयांची फसवणूक केली होती. आरोपींनी संघटित गुन्हेगारी टोळी तयार करून, त्या माध्यमातून टोळीचा व स्वतःचा आर्थिक फायदा होण्यासाठी एकत्रित तसेच वैयक्तिकरित्या जाळे उभारले. विविध सोशल मीडियाच्या माध्यमातून खोटी आमिषे दाखवून शेअर मार्केटमध्ये गुंतवणुकीच्या नावाखाली जास्त परताव्याचे आश्वासन देत सर्वसामान्य जनतेची आर्थिक फसवणूक करण्यात आली.
टोळीतील सदस्यांनी डिजिटल माध्यमांचा वापर करून आंतरराष्ट्रीय गुन्हेगारांच्या संपर्कात राहून फसवणुकीची रक्कम यूएसडीटी (USDT) सारख्या आभासी चलनात वर्ग केली, ज्यामुळे देशाच्या अर्थव्यवस्थेला धोका निर्माण झाला आहे.
या गुन्हेगारांनी संघटितपणे पिंपरी चिंचवड, मुंबई शहर आणि मध्य प्रदेशात सायबर फसवणुकीचे गुन्हे केले आहेत. सायबर पोलीस ठाण्याचे वरिष्ठ पोलीस निरीक्षक रविकिरण नाळे यांनी पोलीस आयुक्त कार्यालयात महाराष्ट्र संघटित गुन्हेगारी नियंत्रण अधिनियम, १९९९ अंतर्गत कारवाईचा प्रस्ताव सादर केला होता. या प्रस्तावाची पडताळणी करून अपर पोलीस आयुक्त सारंग आवाड यांनी मोक्का अंतर्गत कारवाई करण्याचे आदेश दिले.
ही कामगिरी पोलीस आयुक्त विनयकुमार चौबे, पोलीस सह आयुक्त डॉ. शशिकांत महावरकर, अपर पोलीस आयुक्त सारंग आवाड, बसवराज तेली, पोलीस उपायुक्त शिवाजी पवार, सहायक पोलीस आयुक्त विशाल हिरे यांच्या मार्गदर्शनाखाली वरिष्ठ पोलीस निरीक्षक रविकिरण नाळे, सहायक पोलीस निरीक्षक प्रविण स्वामी, पोलीस उपनिरीक्षक वैभव पाटील, प्रकाश कातकडे, पोलीस हवालदार दीपक भोसले, हेमंत खरात, सुभाष पाटील, विनायक म्हसकर, पोलीस अंमलदार अतुल लोखंडे, सौरभ घाटे, श्रीकांत कबुले, महेश मोटकर, प्रविण शेळकंदे, सोपान बोधवड, सुरज शिंदे, दीपक माने, स्वप्नील खणसे, शिवाजी बनसोडे यांनी पार पाडली.
